హైటెక్స్ లో 3 రోజుల కేబుల్ నెట్ ఎక్స్ పో

7వ కేబుల్ నెట్ ఎక్స్ పో విజన్ కు రంగం సిద్ధమైంది. ఆగస్టు 17, 18,19 తేదీలలో జరిగే ఈ ప్రీమియం ఎగ్జిబిషన్ కు  ప్రతిష్ఠాత్మకమైన హైటెక్స్ వేదికగా నిలుస్తోంది. 100కు పైగా దేశవిదేశీ సంస్థలు పాల్గొనే ఈ ప్రదర్శనకు తెలుగు రాష్ట్రాలనుంచే కాకుండా దేశం నలుమూలనుంచి ప్రతినిధులు హాజరవుతారని నిర్వాహకులు, సి ఎన్ సి గ్రూప్ అధిపతి రాము తెలియజేస్తున్నారు.

బ్రాడ్ బాండ్, కమ్యూనికేషన్స్, టెలివిజన్, ప్రొడక్షన్ విభాగాలకు చెందిన ఎగ్జిబిటర్లు ఈ ప్రదర్శనలో పాల్గొంటున్నారు. క్లౌడ్, డిజిటల్ టెరెస్ట్రియల్ టీవీ, కండిషనల్ యాక్సెస్ సిస్టమ్ ( కాస్ ), సబ్ స్క్రైబర్ మేనేజ్ మెంట్ సిస్టమ్ ( ఎస్ ఎమ్ ఎస్ ), డి టిహెచ్, ఈ –కామర్స్, గేమింగ్, వైర్ లెస్ టెక్నాలజీ, హెడ్ ఎండ్ ఇన్ ద స్కై ( హిట్స్ )  తదితర విభాగాలకు చెందిన టెక్నాలజీలను అనేక సంస్థలు ఇందులో ప్రదర్శిస్తాయి. బ్రాడ్ కాస్ట్ ఎక్విప్ మెంట్ తయారీదారులు, కొనుగోలు దారులు, కేబుల్ ఆపరేటర్లు, ఎమ్మెస్వోలు. డీలర్లు, రిటైలర్లు, ఐటి హార్డ్ వేర్, సాఫ్ట్ వేర్ విద్య, పరిశోధక సంస్థల ప్రతినిధులు , ఇంజనీరింగ్ కళాశాలల ప్రతినిధులు ఈ ప్రదర్శనకు హాజరవుతారు.

డిజిటైజేషన్ అమలులో భాగంగా వచ్చిన మార్పులలో ఎమ్మెస్వోలు, ఆపరేటర్లపాత్రను దృష్టిలో ఉంచుకుంటూ కేబుల్ పరిశ్రమ పునర్నిర్మాణం, హెడ్ ఎండ్ ఇన్ ద స్కై ( హిట్స్ ) సాంకేతిక పరిజ్ఞానం, కేబుల్ పరిశ్రమలో విదేశీ ప్రత్యక్ష పెట్టుబడుల అనుమతి, ఇంటర్నెట్ సర్వీస్ ప్రొవైడర్లు ఇంటర్నెట్ టెలీఫొనీ కల్పించే అవకాశం, టీవీ ప్రేక్షకుల లెక్కింపు విధానంలో వచ్చిన మార్పు, కాస్ అమలుకాని చోట్ల టారిఫ్ విధానం, స్థానిక కేబుల్ ఆపరేటర్లకు, ఎమ్మెస్వోలకు ప్రత్యేక లైసెన్సింగ్ విధానం ఈ సందర్భంగా జరిగే సదస్సులలో చర్చిస్తారు.

దేశవ్యాప్తంగా డిజిటైజేషన్ హయాంలో ట్రాయ్ నిబంధనల అమలు ప్రారంభమైన నేపథ్యంలో హైదరాబాద్ లో జరుగుతున్న ఈ ప్రదర్శన ఎంతో ప్రాధాన్యం సంతరించుకుంది. అందుకే ప్రధానంగా ఎమ్మెస్వోలు, కేబుల్ ఆపరేటర్లు పెద్ద ఎత్తున హాజరై అనుమానాలు తీర్చుకొని తగిన నిర్ణయాలు తీసుకోవటానికి ఈ అవకాశాన్ని వాడుకుంటారని భావిస్తున్నారు. అందుకు తగినట్టే రిలయెన్స్ జియో ప్రభావం పరిశ్రమ మీద ఏ మేరకు ఉంటుందనే విషయాన్ని కూడా ప్రధానంగా చర్చించబోతున్నారు.  

Leave a Reply

Your email address will not be published. Required fields are marked *