• Home »
  • BARC »
  • తగ్గుతున్న రేటింగ్స్ – ఆదాయం కోసం ప్రకటనల పరిమితి దాటుతున్న జెమినీ

తగ్గుతున్న రేటింగ్స్ – ఆదాయం కోసం ప్రకటనల పరిమితి దాటుతున్న జెమినీ

సన్ నెట్ వర్క్ పరిధిలో ఉన్న దక్షిణాది రాష్ట్రాల చానల్స్ లో తమిళనాడు మినగా మిగిలిన చోట్ల రేటింగ్స్ ఏమంత ఆశాజనకంగా లేకపోవటంతో ఆ ప్రభావం ప్రకటనలమీద పడింది. ఏదో విధంగా ఆదాయం పెంచుకోవాలనుకుంటున్న సన్ గ్రూప్ చానల్స్ ప్రకటనల రేట్లు పెంచే అవకాశం లేకపోవటంతో ప్రకటనల సమయం పెంచుతున్నాయి. ఆవిధంగా చట్టం నిర్దేశించిన 10+2 నిమిషాల ప్రకటనల పరిమితిని ఉల్లంఘిస్తున్నాయి. తెలుగు రాష్ట్రాల్లో ప్రసారాలందించే జెమినీ చానల్స్ కూడా అదే బాటలో సాగుతున్నాయి.

టీవీ చానల్స్ అత్యంత కీలకమైన సమయంగా పరిగణించే సమయాన్ని ప్రాతిపదికగా తీసుకొని ట్రాయ్ తన అధ్యయనాన్ని వెలువరించింది. ఈ ఏడాది మార్చి 30 నుంచి జూన్ 29 వరకు రాత్రి 7 గంటలనుంచి 10 గంటలవరకు జనరల్ ఎంటర్టైన్మెంట్ చానల్స్ సగటున ఎంత సమయం వినియోగించుకున్నారో లెక్కలు విడుదలచేసింది. గంటకు 10 నిమిషాల వాణిజ్య ప్రకటనలు, 2 నిమిషాల ప్రచార ప్రకటనలు మించకూడదన్న నిబంధనను మీరి చానల్స్ ఎలా ప్రకటనలు ప్రసారం చేస్తున్నాయో ట్రాయ్ వెల్లడించింది.

తెలుగు జనరల్ ఎంటర్టైన్మెంట్ చానల్స్ లో జెమిని టీవీ సగటున గంటకు సగటున 16.21 నిమిషాల చొప్పున ప్రకటనలు ప్రసారం చేస్తుండగా జీ తెలుగు చానల్ గంటకు 13.93 నిమిషాలపాటు, మా టీవీ 12.97 నిమిషాల సేపు ప్రకటనలు ప్రసారం చేస్తున్నాయి. జెమిని కామెడీ 13.8 నిమిషాలు, జెమిని మ్యూజిక్ 14.29 నిమిషాలు జెమినీ మూవీస్ 16.92 నిమిషాలపాటు ప్రకటనలు ప్రసారం చేస్తున్నాయి.

తమిళంలో సన్ టీవీ సగటు ప్రకటనల సమయం గంటకు 17.57 నిమిషాలుండగా స్టార్ గ్రూపు వారి విజయ్ టీవీ 14.18 నిమిషాలు ప్రసారమవుతున్నాయి. కన్నడంలో సన్ గ్రూప్ వారి ఉదయ టీవీ 14.64 నిమిషాలపాటు, సువర్ణ టీవీ 14.10 నిమిషాలు, జీ కన్నడ 13.83 నిమిషాలు ప్రకటనలకు వాడుకుంటున్నాయి.