• Home »
  • Cable »
  • కేబుల్ ఆపరేటర్ల పిటిషన్లకు టిడిశాట్ మార్గదర్శకాలు

కేబుల్ ఆపరేటర్ల పిటిషన్లకు టిడిశాట్ మార్గదర్శకాలు

కేబుల్ ఆపరేటర్లు వ్యక్తిగతంగాను, సంఘంగాను టెలికామ్ డిస్ప్యూట్స్ సెటిల్మెంట్ అండ్ అప్పిల్లేట్ ట్రైబ్యునల్ ( టిడిశాట్) కు పెద్ద సంఖ్యలో ఫిర్యాదులు చేస్తూండటంతో వీటికి కొన్ని మార్గదర్శకాలు రూపొందించాలని టిడిశాట్ నిర్ణయించింది. ఇటీవలి కాలంలో సిగ్నల్ ఇవ్వటం లేదంటూ ఎమ్మెస్వోల మీద ఆపరేటర్లు, ఫిర్యాదు చేయటం, ఆపరేటర్లు ఒప్పందాలు చేయకపోవటం మీద కూడా ఫిర్యాదులు వెల్లువెత్తటం సర్వసాధారణమై పోవటంతో టిడిశాట్ ఈ నిర్ణయం తీసుకుంది.

ఈ మేరకు ఒక నోటీసు జారీచేస్తూ, ఒక ఆపరేటర్ల సంఘం ఫిర్యాదు చేయదలచినపుడు ఆ సంఘంలోని ఆపరేటర్లు అందరూ అందుకు బద్ధులి ఉండిన్ తీరాలని స్పష్టం చేసింది. అందుకే అలాంటి ఫిర్యాదుతోబాటు అందరు కేబుల్ ఆపరేటర్ల జాబితాను జతచేయాల్సి ఉంటుందని పేర్కొంది. ఆ జాబితాలో ఒక్కో ఆపరేటర్ పేరు, చిరునామా కూడా స్పష్టంహా ఉండాలని సూచించింది.

అదే విధంగా ప్రతి ఆపరేటర్ తన తరఫున తమ కేబుల్ ఆపరేటర్ల సంఘం టిడిశాట్ సమక్షంలో ఫిర్యాదు చేయటానికి ప్రాతినిధ్యం వహిస్తున్నదంటూ ఆథరైజ్ చేయాల్సి ఉంటుంది. పిటిషన్ లో పేర్కొన్న విషయాలన్నీ వాస్తవాలని కూడా ధ్రువీకరించవలసి ఉంటుంది. అదే సమయంలో ట్ర్రైబ్యునల్ ఇచ్చే ఆదేశాలకు కట్టుబడి ఉంటానని కూడా ఆపరేటర్ ఒక డిక్లరేషన్ ఇవ్వాలి.